Published by
hillman under
Life on
October 30, 2005
今個禮拜六﹐真係名符其實由朝玩到晚﹗
朝早call左窗簾師父黎左俾料我揀同踱尺。
跟住食Ｄ野﹐睇陣牒。
跟住落樓下會所同朋友打左個半鐘羽毛球。這已是本週第三場羽毛球﹐右手同肩膀跟着開始有點兒酸痛。
跟住o係會所又食Ｄ野同抖陣。
跟住打左兩個game保齡球。上次打保齡球已經係超過兩年前o既事﹐今次打唔出水準﹐可能太累啦﹐不過好彩都有百零分。
出左成身汗﹐沖完涼﹐Ｄ朋友上左我屋企又睇左陣牒﹐跟住齊齊搭車出九龍。羽毛球朋友去食飯﹐我就去接BBQ朋友。
BBQ朋友住美乎﹐趁佢未出現之前去左『嶺南之風』兜左個圈﹐o係十個景區裡面o既『觀雲遂月』度抖下涼﹐影幅相。
跟住去左京士柏菲律賓會『無國界食點』度BBQ。Ｄ野食其實麻麻﹐又唔係平（盛惠每位138大洋）。不過勝在地點鄰近市區﹐有機會同Ｄ新舊朋友聯誼一下﹐冇計啦。
食完以為散band﹐點知有人提議去睇『黑社會』﹐就碌左落旺角『新寶』（前為『金星』）睇子夜場。
散場之後去左同一條街o既『咀妙妙甜品』食糖水。北風剛起﹐食番個清潤o既『雪耳蘋果燉雪梨』就最適合啦﹗糖水唔係太甜﹐重落左無花果同蜜棗添﹗唔錯﹗
咁就一日啦﹗
Published by
hillman under
Entertainment on
October 26, 2005
星期一晚去了看『進念二十面體』的舞台騷《樓市怪談》﹐這是第一次看『進念』的作品。這騷並沒有一個貫徹始終的故事﹐只有數個關於樓市的環節﹐而其中的數個環節以一所地產公司內的經紀們為主角。其中有搞笑﹐亦有悶場﹐我認為整體來說不過不失﹐可以一看。
覺得最有意思的一個環節內有一個模仿時下自以為『食腦』的少女﹐非常生動神似﹐連口頭禪和懶音也學足﹐為此騷最精彩之一部份。
之後在網上找到一篇關於這騷的評論﹐我認為作者寫得頗為中肯。
Published by
hillman under
Event on
October 24, 2005
今日俾人請左去一個生日會……我都好少去呢種咁大陣容o既生日會。個壽星女又真係幾cute喎﹗
Published by
hillman under
Event on
October 22, 2005
好耐冇去過海洋公園﹐早Ｄ放工一大班人柴娃娃﹐都幾過癮﹗
Published by
hillman under
Life on
October 9, 2005
Chapter 1 – 住在錦上路的小女孩
不知是否小弟貌似羊牯﹐無論古今（年幼時或近來）中外（亞洲或澳洲）﹐一直以來不乏“街頭伸手派”攔途截劫﹐要求小弟江湖救急。對於這群仁兄仁姐﹐小弟一向處之泰然。
“伸手派”要錢的借口不外乎“好餓﹐冇錢食飯”或“我住好Ｘ遠﹐冇錢搭車返屋企”。應付的方法亦不外乎“你好餓咩﹖冇錢食飯呀﹖錢就冇啦﹐不如我同你去買野食﹐我請﹗”或“你住好Ｘ遠咩﹖冇錢搭車返屋企呀﹖錢就冇啦﹐不如我同你去搭車﹐我買飛﹗”﹐萬試萬靈。據我個人統計﹐大概一半人聽到會之後會打退堂鼓﹐另一半會跟我去買食物或車票。
其實如果在能力範圍之內的話﹐小弟是樂意解囊相助﹐畢竟今天口袋中有零錢可花亦有賴幸運之神眷顧﹐怕的只是捐出的錢到手後是用來滿足他們的毒癮或賭癮﹐幫他反而變了害他。不過今次﹐當遇上“住在錦上路的小女孩”﹐小弟也只好嘆一聲束手無策。
事源在星期天﹐當我步行到巴士站途中﹐一名手抱小女孩﹐皮膚黯黑﹐身材瘦小﹐報稱住在錦上路的中國籍婦人將我截住﹐聲稱她家裡遭逢倫理悲劇﹐冇錢開飯﹑搭車﹑云云﹐想我方便廿蚊。當時﹐對她的“遭遇”﹐我真的不大感興趣。理由之一可能是小弟欠缺同情心﹔另一理由是如果她的故事是真的﹐可以幫到她的是社工而不是我﹔如果她的故事是編的﹐我更加沒興趣聽。所以我當時用一貫手法﹐對她說“車﹐我可以帶你去搭﹐車錢我出﹔食物﹐我可以帶你去百佳掃貨﹐我找數。”開始時婦人不大願意﹐但經我再三堅持﹐她終於答應﹐並起行步向百佳。
記得上次發生同樣事情是在悉尼﹐跟一個鬼仔去七仔買了熱狗和汽水。當時我心想﹐究竟直到何時她才會打退堂鼓﹖如果她真的去掃貨﹐又會掃Ｄ乜﹖
到百佳之後﹐我說我會在收銀機處等她﹐由她隨便買。最後她只揀了一支1.25公升減價忌簾汽水﹐數個出前一丁九洲豬骨濃湯麵﹐而小女孩手上拿了一包嘉頓朱古力手指。我問她她的小朋友要喝奶粉嗎﹖她說剛戒了﹐而且奶粉很貴。最後埋單﹐合共廿四個幾。
出了門口﹐婦人再次請我幫忙廿蚊﹐說她連明天乘車去社處領綜援的車費也沒有。這時﹐我發覺我再沒有理由推辭﹐便掏出一張二十元鈔票給她。跟著我着蹲下來對那個小女孩說﹐記緊要聽媽咪話。小女孩似懂非懂﹐想了一會之後﹐輕聲地說知道。
分手之後﹐我快步行向巴士站。當時我以為故事已經完了﹐正在巴士站回想所發生的一切時﹐我看到那個婦人和小女孩正在鄰近的一個巴士站等車（錦上路方向）﹐當婦人看到我正在望她時﹐她向我微笑揮手。
跟着我在等的巴士來了﹐臨上車的一剎﹐我看到婦人正在喝汽水﹐小女孩正在吃朱古力手指。
在車上﹐我將整個過程從新組合一次﹐我得的結論是婦人對我說的話未必句句屬實﹐或者有誇張成份﹐但是我相信她應該是屬於有需要幫助的一群。當時我心想﹐其實我寧願婦人所說的一切都是謊言﹐也不願意那個住在錦上路的女孩在這樣的家庭裡長大。
Chapter 2 – 貓展裡的貓
懶左咁耐﹐終於嘀起心肝post左上網啦﹗
今次想影多Ｄ人同貓有 interaction o既相﹐原來重難影過淨係影貓﹐因為當有人搞緊隻貓o個陣佢會郁黎郁去。
