回水

Published by hillman under Life on April 30, 2009
Tags: Life.

某日﹐一支公食晏﹐踱步去筷子記。間嘢冇乜特別﹐最特別係個老闆。

事源當日午飯時間﹐店內坐位九成滿﹐進店後隨便找個位置搭檯坐下﹐點了三十元的三餸麵﹐凍飲加兩蚊。等候食物過程中﹐對面兩位小姐離去﹐之後有店員要求調換另一位置﹐好讓在外面等候的三位可以同坐。一個人搭檯的話﹐這種場面極常見﹐唯有乖乖起身調位。

坐定之後﹐一位貌似老闆的阿叔走上前﹐講聲“唔好意思”﹐跟着在單上將“３２”改成“３０”！心想﹐俾人要求調位試得多﹐調完有得回水都係第一次！

記得黃子華喺《鬚根Show2》入面所講﹕“今時今日嘅香港﹐仲有一大班人﹐係以為人哋會回水咁天真架！”。原來香港真係有回水架！